Manifesto de solidaridade com a Catalunya

Tal como dizíamos o ano passado, o povo catalán topa-se diante de umha das mais importantes encruzilhadas da sua história, a só uns dias de umha histórica cita eleitoral que tem adquirido, embora a negativa do Estado, um verdadeiro carácter plebiscitário. O vindouro dia 27, o povo catalám tem a oportunidade de definir nas suas instituiçons até agora autonómicas uma maioria política que declare formalmente a independência e transforme o seu país num novo Estado no concerto dos Estados do mundo.

Até hoje, os diferentes intentos de encaixar Catalunha no marco espanhol fôrom sempre respondidos com negativas, curtes e becos sem saída que acabárom demonstrando que o exercício unilateral da democracia e do direito a decidir é a única via real para a resoluçom do conflito.
O rápido crescimento do independentismo até se tornar um auténtico movimento de massas e mais a sua transversalidade demonstram, nos últimos anos, a impossibilidade de constringir a situaçom às estreitas e inoperantes margens que prevê o Estado espanhol para o exercício democrático. Um Estado espanhol que, entre outras cousas, negou o direito ao voto e ameaçou a povoaçom, e processou diversos agentes pola consulta democrática que a sociedade civil catalá promoveu a respeito da independência da Catalunha o passado 9 de novembro.

Espanha continua a amparar-se na lexislaçom herdada da ditadura, nomeadamente na Constituiçom Espanhola, para afirmar umha e outra vez que é impossível qualquer mudanza do marco institucional, mas o certo é que poucos povos do mundo puidêrom exercer o seu direito de autodeterminaçom sen previamente terem proclamado unilateralmente a sua independência formal. Novamente, diante das ameaças jurídicas, políticas, mediáticas e policiais lançadas polo governo de Madrid, as organizaçons que assinamos este manifesto queremos transmitir a nosa solidariedade ao povo catalám, assim como o nosso apoio às forças políticas que, por diversas vias, se apresentam a estas eleiçons plebiscitarias o 29 de setembro com a intençom de atingir umha maioria suficiente para proceder à declaraçom da Independência.

Como há um ano, apoiamos também o direito do conjunto dos Países Cataláns a decidir o seu futuro polos motivos que entom expugemos: por um elementar sentimento de solidariedade com todos os povos do mundo e polo apoio incondicional ao exercício do direito de autodeterminaçom como possessom inalienável de qualquer naçom. Somos também cientes, como entom, de que a abertura que hoje está a protagonizar o povo catalám contribuirá para normalizar a nossa própria aposta pola liberdade e pola soberania plena da Galiza. As organizaçons que apoiamos este manifesto fazemo-lo cientes de que a questom nacional se tem convertido num verdadeiro ponto fraco do regime político espanhol instalado na Transiçom, e que hoje constitui a principal via de ruptura precisamente com o sistema que o alimenta.

Finalmente, e do mesmo jeito que na anterior ocasiom, as assinantes desta Plataforma Galiza com a Catalunya animamos a numerosa comunidade galego-catalá a se implicar nestas eleiçons plebiscitárias, participando ativamente a favor da independência da sua segunda pátria, com a confiança de que algum dia participem tamém na libertaçom da primeira.

Organizaçons assinantes: 

Agir

Agora Galiza

Anova – Irmandade Nacionalista

Asociación Cultural A Galleira

Bloque Nacionalista Galego

Briga

Causa Galiza

Colectivo Nacionalista de Marín

Confederación Intersindical Galega

Frente Popular Galega

Isca!

Mar de Lumes – Comité Galego de Solidariedade Internacionalista

Movemento Galego ao Socialismo

Partido Comunista do Povo Galego

Primeira Linha