Ésitu de participación na xornada astur-vasca en Getxo.
Alrodiu de les 14 hores llegaben a Getxo la mayoría d’asturianos participantes na Folixa, y los reponsables d’Itzulbaltzeta Gaztetxea ufiertáben-yos una gran paella de la que dieron bona cuenta unes 70 persones.Enantes, yá se abríen les primeres botelles de sidra, de les 240 consumíes de forma gratuíta a lo llargo del día y dellos asturianos intentaben deprender a tocar un poquiñín la txalaparta.
Poco dempués de les 17 hores proyeutábase'l documental "Aida" de Pablo Quiroba y Míguel Fernandi charraba llueu de la situación llingüística asturiana. Estos dos actos cuntaron con cuasi un centenar d’asistentes.Hasta les 10 de la nueche, hora del conciertu de Skama La Rede y Oi! N'Ast, pudo sentise música n'asturianu y presentóse'l cantar "Fala", iniciativa de "Musicos pola Oficialidá" y la Xunta pola Defensa de la Llingua Asturiana.
Tres esfrutar d’una actuación d’una pareya de gaita y tambor, xubíen al escenariu Skama La Rede primero y Oi! N'Ast dempués. Énte 200 persones los grupos asturianos fexeron movese y muncho a la mocedá vasco. Pasaes les 5 la mañana piesllábense les puertes d’Itzulbaltzeta Gastetxea d’onde siguía colgando de les ventanes del pisu d’arriba una pancarta cola lleenda "Oficialidá Agora. Puxa Asturies Dixebrá".