Organizacións e colectivos estudantís convocan folga o 26 de Febreiro

As organizacións estudantís galegas, xunto con outros colectivos e asembleas, chaman a parar o 26 de Febreiro as universidades e escolas na defensa do ensino público e contra a "miseria, precariedade, a falta de recursos e de espectativas" que están a promover os gobernos de Madrid e da Xunta. 

A convocatoria, lanzada por Agir, Comités e a Liga,Acción Universitaria, AEOP, ARDE, Asemblea Aberta de Lagoas, Asemblea Campus Histórico, Asemblea Campus Sur, Asemblea EcoAde, Asemblea de Estudantes de Burela, Asemblea Estudantil do Couto, Asemblea Filoloxía, Asemblea FP Politécnico e CEL.  parte dun proceso "diálogo, debate e deliberación asemblearia" na que confluíron as organizacións estudantís, colectivos e asembleas asinantes. No manifesto conxunto chaman a "berrar cunha soa voz" contra a precariedade laboral entre o profesorado e os recortes no ensino público. 

"Opoñémonos xuntas a que nos quiten as bolsas, a que endurezan os requisitos para obtelas mentres recortan e deixan a campus e institutos en situacións dramáticas, cunhas infraestruturas avellentadas e cun profesorado que cada vez é menos e cunhas condicións de traballo máis duras", explican no texto difundido através dos seus portais web. 

Aliás, salientan a súa defensa dun "ensino público e de calidade" que tire das aulas "o patriarcado" e promova unha educación "en igualdade".
Cumprido protagonismo queren darlle nesta xornada de loita a situación lingüística que atinxe Galiza. O descenso do número de falantes, alertan, sitúa a lingua galega na "peor crise da historia" polo que exixen, din, "un ensino monolingüe" que sexa tamén "científico" e "popular".

Organizacións estudantís asinan un manifesto conxunto

Pola súa banda, as organizacións estudantís Agir, Comités e Liga, asinaron un manifesto conxunto no que chaman o estudantado galego a se mobilizar e baleirar os centros de estudo fronte o contexto actual marcado, din, por unha crise económica que é usada como "pretexto" para "abafar" as maiorías sociais mentres "enche os petos das elites políticas e económicas". 

No manifesto pendurado nos seus portais web as organizacións estudantís da esquerda independentista e nacionalista aseguran que "o ensino non é alleo a esta situación" como reflicten as "políticas da tesoira".
"Estes continuos ataques ao ensino público denótanse na redución e endurecemento das bolsas xerais, das axudas para libros de texto e do material escolar, na eliminación das axudas para comedores escolares e, en xeral, na redución da calidade e precariedade da situación laboral das traballadoras", afirman. 

E é que para o vindeiro ano 2015 a Xunta de Galiza recortará un 20% os orzamentos destinados ao ensino así como se prevé a aplicación da Estratexia Universidade 2015 que se suma ao Plan Boloña instaurado nos últimos anos. "Adaptan as aulas e os plans de estudo a unha situación na que a única saída para as mozas que rematan os seus estudos son a emigración ou a escravitude", denuncian as organizacións estudantís. "Impóñennos miseria, precariedade, esíxennos esforzos e sacrificio, mentres eles aumentan os seus beneficios e manteñen intacto o statu quo á nosa costa". 

Neste senso, instan o estudantado a "construír desde as rúas un ensino verdadeiramente público e galego" e a "non ficar caladas mentres destrúen o pouco público que queda" mais tamén a "loitar" por un "ensino popular, científico, antipatriarcal e galego". 

Fe de grallas. Este artigo foi editado após a súa publicación. Por erro atribuíuse a convocatoria inicial ás organizacións estudantís e díxose que con posterioridade se adheriran a ela outros colectivos e asembleas. Porén, a convocatoria partiu dun proceso de debate previo no que todos os axentes estudantís participaron en pé de igualdade.