Organiza a tua raiva, por umha Galiza livre,vermelha e lilás

Hoje, de BRIGA iniciamos a nossa campanha ‘’Organiza a tua raiva. Por umha Galiza livre,vermelha e lilás’’. Esta campanha estará configurada por numerosas palestras e colóquios que tratarám de visibilizar dumha forma pedagógica a situaçom de deriva antidemocrática do Estado Espanhol, visibilizar a situaçom de emergência da nossa língua, a precarizaçom dos nossos recursos, a luita contra o capital e o sistema patriarcal e a solidariedade com os diferentes povos que luitam pola sua emancipaçom nacional, de classe e de género.

Vivemos numha época onde o capitalismo nom é capaz de sustentar as suas próprias contradiçons, onde a classe dominante artelha a restriçom progressiva das nossas liberdades individuais e coletivas e dos direitos humanos com o objetivo de conservar os seus privilégios e manter os seus padrons de vida

Quais som as principais prejudicadas? A classe operária. Perante esta situaçom é imprescindível a socializaçom do independentismo, ferramenta necessária para fazer umha revoluçom socialista em chave galega e para atingirmos o nosso objetivo: a emancipaçom nacional de classe e género; já que o Estado Espanhol é o principal expoente de exploraçom da classe operária na Galiza e das diferentes naçons que o integram.

Qual é o método de luita para conquistar o nosso objetivo? A desobediência, a luita constante nas ruas, defendermos coletivamente o princípio de autodefesa diante da violência estatal e assinalar os máximos responsáveis da exploraçom da nossa classe.

Vivemos num momento onde a juventude galega tem que rebelar-se no presente para revelar o futuro, temos que acordar do nosso conformismo, para construirmos um novo futuro, onde o Povo Trabalhador seja o sujeito da direçom política da nossa sociedade. E para isto é imprescindível ‘Organizar a tua raiva’ .

Como jovens vemos como ano após ano temos que emigrar por falta de oportunidades; como vivemos numha situaçom de desemprego ou de emprego precário que nom nos permite viver dumha forma digna, como nos sobem os alugueres, como descem os salários e cresce a riqueza dos menos mentres vemos como as nossas familiares nom som capaces de chegar a fin de mês.

Os direitos conquistam-se na rua e a mocidade combativa tem que ser umha parte importante neste processo. Por isso apelamos à juventude galega a organizar a sua raiva por umha Galiza livre , vermelha e lilás!

ORGANIZA-TE POR UM FUTURO DIGNO PARA A JUVENTUDE GALEGA.

ORGANIZA A TUA RAIVA.

POR UMHA GALIZA LIVRE, VERMELHA E LILÁS!