¿A crisis con España? No, grazias

Ya ban salindo articlos y opinios dende os meyos no ofizials an que se aclare un mica o panaroma internazional, y más que más europeyo, debán d’a crisis finanziera. Primero estió Islandia la que beyó como a suya economía s’esboldregaba y agora ye Irlanda la que parix que a suya economía ye en a muga d’a quiebra. As dos economías tienen l’alazet en o mesmo supuesto: no se ha a menester produzir riqueza, ye prou con empentar la que se tiene en o calaixo inmobiliario y finanziero. Ye zierto que o “Celtic Tiger”, agora estransiu de tot, ha abusau d’as aduyas europeyas que so han feito que bosar as deudas a os burgueses. Pero no podemos amagar que dentro d’a colla d’os próximos países europeyos en cayer i será o estau español, chunto a Portugal u Grezia. L’anunzio d’a quiebra d’Irlanda fazió que os meyos burgueses españolistas le fesen culpable d’a puyada en a rezesión europeya, d’a mesma traza que agora le’n ferán a España en a resta d’Europa. A reyalidat de fracasos como o irlandés, y agora o español ye l’abandono productibo ta zentrar-se en o improductibo, a economía finanziera y especulatiba, que no produze riqueza. Nomás redistribuye a riqueza existén, concentrando-la en pocas mans (siempre las mesmas). Ye platero que istas trazas de produzir se han imposau en Aragón, y no tremolo al dizir que dende a burguesía española. O suyo máximo exemplo ye EXPO Zaragoza 2008 que ha dixau un “treballo” improductivo que destina buena parti d’o capital a quedar-se-ie conchelau en edifizios que no se fan serbir; a l’igual que en a resta de bibiendas buedas a l’arreu de tot Aragón do os suyos propietarios i han bisto un puesto d’imbersión, deixando-las buedas, asperando a que o suyo pre puye. Continando con o mesmo filo a supraexplotazión d’as redoladas amanadas a las pistas d’esquí los fan terrenos amanaus a contribuyir a la crisis. Lomas de Badaguás, las Margas, Baños de Pandicosa, Formigal,… han feito que interpresas como Ibercaixa, Martinsa Fadesa u Nozar empentadas por o capital españolista aigan feito d’o Pirineo aragonés o puesto an que desembolicar o suyo plan especulatibo, y que en beyer-se a craba roya han fuyiu si nian aber rematau o suyo compromís.

Nian o negozio d’as enerchías renobables se ha salbau d’as puercas mans capitalistas en Aragón. O sector estrela d’o gobierno español, desembolicau por toda la suya parafernalia progre españolista, se ha deixau en mans d’especuladors corruptos como l’alcaldesa d’o PAR en La Muela, María Victoria Pinilla, con plaza de toros incluyida. Dentro d’o sector de renobables podemos incluyir-ie atras d’as apuestas productibas d’o PSOE en Aragón, a industria papelera, siempre pendendo d’o mercau nordico pues aquí se fabrica papel esbiellau. Pero que nunca no se le ha dau guaire bamba pues un prochecto de trascole como o que o PSOE estió a punto de fer fa unos meses ese escanau o paper en Aragón.

O destino productibo en Aragón no ye en mans d’os treballadors aragoneses. O más claro exemplo lo podemos beyer en as negoziazions ta que Opel contine en Figueruelas. Tot mobilizando-se y fendo-se-ne os treballadors aragoneses se trigó una representán benida dende o ministerio español d’industria en Madrit (Teresa Santero) ta negoziar o futuro de GM “España” en Bruselas. As relazions internazionals siempre han estau un campo biedau dende España t’Aragón, a exportazión en cualsiquier interpresa aragonesa dillá d’os Pirineos ye menima y as pocas interpresas en que a suya exportazión ye importán han abiu de benir de difuera d’Aragón ta implantar-se aquí. Siempre con a buega d’un túnel trancau ta esnabesar os Pirineus. Somos charrando siempre d’interpresas, interpresas en mans de capitalistas burgueses, porque atro tema sería o sistema de Cooperatibas que en Aragón ha estau cuasi biedau por a riqueza burguesa.

Con iste panorama y sentindo a Pizarro dizir que ha feito que Teruel se desembolicase, porque i teneba espezial intrés. Nomás nos quedará una ziudat museu en Teruel y o nuestro destino a espensas d’a indibisible pero arruinada España. Limpio fer declarazions contino de que “son millor paraus que atros países ta soportar a crisis” y en espezial en Aragón porque se fazió a EXPO’08, lo mesmo que feban os ministros islandeses e irlandeses dica fa poco, a reyalidat ye que a situazión d’España ye cretica. Standard and Poor’s ye a parola que fa serbir a bolsa de Nueba York ta intrepresas y países de segundo ran. Astí ye an que son agora España, Grezia y Portugal en Europa, marguinaus por a resta y que como emos contrimostrau arrozegará a Aragón por o espaldero a tot tranze.

*Apuntes de Luciano Alzaga, La Haine

http://aenrestida.wordpress.com/