Fendo alcordanza: 70 añadas d'a Reboluzión Sozial

Fendo alcordanza: 70 añadas d'a Reboluzión Sozial.

Estiaño se'n fan 70 de bels feitos que marcón a istoria d'Aragón y de tot l'estau español. A sublebazión melitar y faxista d'o 18 de Chulio contra o gubierno d'o Fren Popular que desembolicó en una guerra zebil sinnificó tamién l'escomenzipie d'un prozeso reboluzionario que a clase treballadera beniba chestando dende años antis.

A rispuesta a o faxismo, brazo armau d'a burguesía, per parti d'os treballadors estió a mobilizazión popular, a esichenzia a o gubierno republicano de prener as armas ta esfender a libertat y a creyazión en bels puestos de l'estau de nuebas trazas reboluzionarias de organizazión sozial y economica. Aragón concretamén estíó un d'ixos puestos, y o más importán, an que se lebó a cabo ixa faina.

O país quedó trestallau en dos metaz cheograficas y politicas, estando a metat oriental que resistió a o faxismo baxo control mayoritario d'a CNT, o que permitió un prozeso de coleutibizazión d'as tierras d'os lugars y d'autochestión per parti d'os treballadors, de traza que dende chulio de 1936 dica agosto de 1937 se proclamó lo comunismo libertario y se i creyón más de 400 coleutibidaz rurals en as que i feban bida 150.000 personas. S'eslichió un organo instituzional de coordinazión que se clamó Consello d'Esfensa d'Aragón u Consello d'Aragón, de primeras endrezau per CNT pero en o que dimpués i partizipón as atras fuerzas de cucha, mesmo lo PC y que autuaba con gran ran d’independenzia d'o gubierno republicano.

Aragón estió eszenario d'una esperienzia cuasi unica n'a istoria d'a umanidat, fueras d'atros intes como a Comuna de París, u a Reboluzión d'os Soviets en Rusia antis d'a burocratizazión. Os treballadors meteban en prautica a masima de que a emanzipazión d'a clase obrera ha de estar feita per ella mesma y se prozedeba a la coleutibizazión d'os meyos de produzión, a la organizazión orizontal y asambleyaria d'a soziedat, y a l'abolizión d'o treballo asalariau y d'os diners. Mientres en a linia d'o fren se combatiba o faxismo en a retaguardia se feba la Reboluzión. Dentro d'o trachico eszenario d'a guerra, o pueblo aragonés estió per primer y zaguer begada en a suya istoria amo d'o suyo esdebenidero, crebó os estrinques d'a explotazión capitalista y sentó os alazez d'una nueba soziedat en libertat y igualdat.

O gubierno republicano prebó de controlar l'Aragón libertario per o suyo cariz autonomo y soberano respeuto a la Republica española. D'a mesma traza, l'estalinismo contrarreboluzionario no beyeba con buenos güellos un prozeso politico que no controlaba y que amostraba a o mundo que yera posible construyir o sozialismo dende abaixo, sin a suya tutela, con l'auto-organizazión popular. Y a la fin en agosto de 1937 o presidén español Juan Negrín quitó un decreto de disoluzión d'o Consello d'Aragón y d'as coleutibidaz, estando a IX Dibisión de Lister y d'o PCE a encargada de fer-lo per a fuerza. Y dimpués, a represión y persecuzión contra os coleutibistas. Represión que s'estendillaba tamién difuera d'Aragón a radiz d'os afers de mayo de 1937 en Barzelona, a toz os comunistas d'o POUM y anarcosindicalistas d'a CNT fren a la linia conserbadera mantenida per l'alianza d'o republicanismo burgués y l'estalinismo.

As coleutibidaz sinnificoron con os suyos aziertos y as suyas errors, a mayor esperienzia reboluzionaria y soberana que emos bibiu os aragoneses. En ixe periodo que tasamén duró un año iste pueblo metió en prautica os conoiximientos de decadas de luita d'a clase obrera y amostró que podemos bibir de traza diferén a la que mos imposa o sistema capitalista. Prou que muitas d'istas cosas serán conoixidas per asabelo d'os que i leyez, pero tamién bi'n abrá muitos que no pas, Cal alcordar-nos-ne y amostrar-lo perque ye parti d'a memoria d'iste país y d'o conchunto d'a clase treballadera.

+ Info: www.aenrestida.tk / aenrestida@hotmail.com
Z.S.A A Enrestida (Callizo San Cristobal s/n, La Madalena, Zaragoza)