A bandeira da Uniom Socialista Galega (1933)

A Uniom Socialista Galega, liderada por Johám Jesus Gonçales, que luitava pola independencia e o socialismo, adoptou numha reuniom do seu Comité Central, em fevereiro de 1933, que “a bandeira de U.S.G. seja completamente vermelha com umha franja diagonal de direita a esquerda, a qual ostente as cores galegas” (El Pueblo Gallego, Vigo, 09/92/1933), sinalando o historiador Héitor Picalho que “quando as cores da bandeira galega vam de direita a esquerda, coido que se tem que referir, evidentemente, aos cantons da bandeira, nom dende o ponto de vista do observador”.

Na causa 128/36, conselho de guerra no que o fascismo “julga” Johám Jesus Gonçales Fernandes, os informes apresentados por Gutiérrez Cabeza sinalam a resistência do Terço de Calo, liderado polo canteiro de Cúntis. Textualmente, diz que Joám Jesus “andivo polas ruas de Santiago, ao frente de um grupo armado composto por umhas setenta pessoas, precedido de umha bandeira vermelha em cujo remate figurava a fouce e o martelo comunista, e em correta formaçom encontrando-se mais tarde na praça do Hospital [hoje praça do Obradoiro] desta cidade ao frente de dita gente armada”. De novo, para Héitor Picalho, em entrevista do galizalivre.org, sinala que “Quando estala o fascismo em Compostela Johám Jesus encabeça o Terço e passa por diante do Quartel de Artilharia, a hastear a bandeira vermelha (que os sublevados interpretárom como a bandeira comunista), mas que nom vinha a ser outra cousa que a bandeira da USG, quiçais a primeira bandeira soberanista galega (que era a fusom das cores galegas com a comunista)”.

Apresentamos aquí a recriaçom desta bandeira histórica, por força aproximada, ao carecer de fotografias, obra de Ruth Caramês, baseada na documentaçom de Héitor Picalho.