"Avilés escontra la crisis"

Una riestra organizaciones sindicales, polítiques y sociales intentamos crear n’Avilés un espaciu de llucha xunitariu y abiertu, “Avilés escontra la cris”, sofitáu nel siguiente MANIFIESTU:

Quienes sofitamos esti manifiestu, queremos asoleyar el nuesu más fondu refugu a los retayos sociales anunciaos polos estremaos gobiernos estatal y asturianu, que sopelexen el fondu francimientu ente quienes ostenten el poder políticu y económicu y quienes carecemos la cris nes nueses propies carnes.

Llevamos yá tiempu abondo careciendo les consecuencies de la cris económica prevocada por esti sistema neolliberal: el desemplegu, la precariedá, l’amenorgamientu y conxelación xeneralizada los salarios, el xorrecimientu los impuestos y los precios, la reforma llaboral y, agora, los anunciaos retayos en Sanidá, Educación y Servicios Sociales.
El podrigañamientu’l sistema financieru y la so insaciable avaricia, menacia con siguir pasándonos la factura de la so especulación. Magar nun podemos facer cálculos precisos dafechu, pues l’altor de tresparencia nes aídes a la banca ye nulu, la magnitú los desembolsos en 2010 ya yera evidente: sumaron 88.800 millones d’euros (magar que dalgunes fontes súbenlo fasta los 110.000 millones), equivalente al 8,5% del PIB. Demientres esa mesma dómina de tiempu, el gastu públicu empobináu a financiar les prestaciones por desemplegu foi aprosimadamente de 66.400 millones d’euros. Anguañu, l’Autoridá Bancaria Europea calcula que’l montu total desviáu a la banca ye supera los 200.000 millones d’euros.

El fraude fiscal, acabante amnistiar, asciende a 90.000 millones d’euros añales, la economía somorguiada mueve cuásique 250.000 millones d’euros, la Xunión Europea lleva gastaos 400.000 millones d’euros en rescatar a la banca y nos paradisos fiscales hai depositaos 6 BILLONES d’euros.

Esti añu, solo col dineru invertíu nel rescate de Bankia (más de 23.000 millones d’euros) hubiérense aforrao los retayos de Sanidá, Educación y Servicios Sociales. Agora dicen que pa sanear el sistema financieru español van facer falta munchos millones más. Asina, ye imposible que cuadren les cuentes públiques; la torga nun ye’l dineru invertíu en gastu social, sinon el que se desvía pa cubrir los beneficios d’unos pocos.

Na otra cara la moneda, tamos quienes soportamos la cris dende embaxo. Seis millones de paraos y paraes nel Estáu español. Cien mil n’Asturies. El 40% yá nun cobra nada y otru 30% cobra menos de 600 euros. Un millón setecientes mil families, 35.000 d’elles asturianes, tienen a tolos sos miembros en paru. Más de la metada los y les pensionistes cobren menos de 600 euros. El 55% la mocedá ta nel paru. Mediu millón de families perdieron yá les sos viviendes y una de ca cuatru presones (el 25% la población) ta na probitú o na probitú severa.

Na nuesa comarca, la cris dexose sentir especialmente nes cifres de desemplegu, que pasaren de 6.000 paraos y paraes a la fin de 2007 a 15.000 n’abril de 2012, ¡cuásique triplicóse nestos años de cris!. Y nin el polémicu proyeutu Niemmeyer, nin los cacarexaos planes d’emplegu municipales fueron quien a frenar esta realidá, que dexa nes nueses cais un rastru ca vegada más xorreciente de probitú y esclusión.

Comu ya s’anunciare, el nuevu Gobiernu asturianu va acometer un retayu de cuásique 500 millones, que nun va facer otra cosa que facer xorrecer el paru y tornar el drechu a la Salú, laEducación y los Servicios Sociales nun privilexu al que namás van poder aceder aquellos que puedan pagalo. Y p’aumentar los ingresos, tamos seguros y segures de que nun van recurrir a les rentes más altes, sinon que van facenos pagar a los y les mesmes, al través de los impuestos indireutos o del copagu (repagu) de drechos fundamentales comu la Sanidá.

Por estes razones, na cabera dómina asistimos a un xorrecimientu les movilizaciones, con dos fuelgues xenerales, fuelgues seutoriales indefiníes y un ensin fin de manifestaciones multutudinaries que demuesaron que la mayoría social refuga d’esta política. Pero necesitamos ser más, necesitamos cuntar con toes y toos.

Y la esplosiva situación social que se ta creando, ta siendo retrucada dende’l Gobiernu con una escalada descomanada de la represión. La reforma’l códigu penal anunciada, propia d’un estáu totalitariu, castiga con fuertes condergues cualisquier forma de discrepancia organizada. Ta nidio lo que pretenden: acallanos baxu menacies y criminalizanos.

Nun tenemos llerza y sabemos qu’énte esta situación nun queda otra salida que la movilización social, oponer la nuesa refuga na cai y dexar nidio que nun aceutamos siguir pagando la so cris. Darréu d’ello, decidimos costituyir esti espaciu de xunidá que va permanecer abiertu a quienes-yos pete facer frente a un sistema capitalista corruptu que nin un res tien qu’ufiertar a la mayoría social trabayadora.

Pa finar, queremos asoleyar el nuesu sofitu a los y les trabayadores de la minería y el tresporte, que s’atopen en fuelga indefinida y marquen el camín haza una necesaria ya inaplazable fuelga xeneral n’Asturies.

Convócase concentración esti vienres 22 a lesm19:30 h. el Parche (plza. l'Ayuntamientu) d'Avilés