Barricaes y seguimientu total na primer xornada de fuelga en Saint Gobain

Esti sábadu la plantiya de Saint Gobain nes sos instalaciones d'Avilés, asina como nel restu l'estáu, desendolcaron la primer xornada de fuelga de les 43 programaes polos representantes sindicales. El seguimientu foi total, aparando dafechu toa actividá nes instalaciones de producción de la multinacional cristalera. Amás, hebo aiciones de protesta, como la colocación de barricaes pa cortar los accesos a la factoría avilesina.

Los representantes sindicales nun recibieron nengún tipu de reaición a la fuelga viniente de la direición de la empresa, que sigue ensin apurrir soluciones a la situación de conflictu. Los trabayadores quieren negociar un nuevu conveniu qu'afite unes condiciones llaborales dignes y adecuaes a la situación de la empresa, al tiempu que desixen l'abonu de les remuneraciones que la empresa adeuda dende va meses.