Desconvocaes les fuelgues en Starglass y ArcelorMittal

Sensación de triunfu ente los trabayadores de Starglass na so factoría de Sovilla (Mieres), y ye que depués de casi una decena de xornaes de fuelga, la empresa accedió a nun aplicar la supresión de complementos salariales que suponía una mengua d'ente 180 y 210 euros de los sos sueldos. Amás, Starglass aseguró tamién nun acta xudicial el pagu de les perres que-yos adeuden, concretamente la paga d'Agostu y el 75% d'una paga extra. La unidá y combatividá de la plantilla fizo posible esta victoria obrera.
En cuantes a ArcelorMittal, la direición de la compañía anunció que renuncia a la so intención de recurrir a la nueva reforma llaboral como mena de saltase l'actual conveniu, polo qu'acepten entamar una etapa de negociaciones "ensin presiones" ente sindicatos y la empresa. Poro, queda desconvocada la xornada de fuelga del día 29 de Setiembre nes plantes asturianes d'Arcelor.