B.I.C. 14 Abiento Zaragoza. A cucha que luita ye en a carrera

ISTE BIELLO PUEBLO ENCARA RESISTE

A CUCHA QUE LUITA YE EN A CARRERA

Una añada más plega o 20 d´Abiento, una calendata alazetal en a istoria d´o nuestro pueblo. Ixe diya no remeramos l´asesinato d´un miembro d´alta nobleza aragonesa, Chuan de Lanuza, Chustizia Mayor d´o Reino. No remeramos unas leis meyebals, os fueros, ni unas Cortes estamentals. No remeramos un “glorioso pasau” como Reino, do lo pueblo no pintaba mica antiparti de serbir y obedexer.

O 20 d´Abiento remeramos que en 1591 as clases populars d´o nuestro pais surtión t´a carrera ta esfender os suyos dreitos como aragoneses/as. Ta fer frén a una imposizión que creyeban inchusta per parti d´a monarquía ispanica. Ta chilar que somos un pueblo y que os nuestros afers os soluzionamos nusatrxs mesmxs y no pas un rei extranchero como yera Felipe II de Castiella.

Remeramos que dimpués d´as algaradas populars contra o monarca, iste respondió con a inbasión melitar d´o pais con un exerzito de 20.000 soldaus. Remeramos a os nuestros chirmans y chirmanas condenaus a muerte y executaus, arredol de 50 en tot lo país, a mayor parti labradors, sirbiens u treballadors manuals. Remeramos a os zientos de detenius y sosmesos a tormento (o que güe clamamos tortura), a os engarcholaus, a o exiliaus y a os que abión de pasar a la clandestinidat ta continar con bida.

Remeramos que dimpués d´a represión, Felipe II ordenó a construzión de fortificazións en bels puestos d´o país ta aloxar-ie destacamentos melitars y prebar d´ebitar futuras insurrezions. Y a la finitiba, remeramos que iste ye l´escomenzipie d´a imposizión española sobre Aragón y d´a construzión d´una nueba reyalidat artifizial alazetada en a represión, a biolenzia melitar y a uniformizazión cultural, clamata España. Y será más d´un sieglo dimpués, en 1707, cuan dezaga d´una nueba ocupazión y per dreito de conquista d´os españols, rematará o prozeso de desaparixión d´a nuestra identidat como pueblo.

Os/as independentistas reboluzionarios aragonesxs emos de recuperar o carauter combatibo d´ista calendata. Emos de organizar a resistenzia contra España y contra o Capital, y güe, como fa más de 400 añadas, os que somos abaixo, as clases populars, emos de autuar y luitar dica la total liberazión nazional y sozial d´Aragón.

A luita independentista ye una luita reboluzionaria, no puede estar de una atra traza. Ye una luita contra un estau capitalista que nos oprime como pueblo y nos explota como clase. Que estricalla a nuestra luenga y a nuestra cultura. Que plena a tierra nuestra de poligonos melitars, entibos, empandullos economico-especulatibos como a Expo u Aramón, macro-zentros d´exterminio d´as personas como a garchola de Zuera u que explota os nuestros recursos naturals. Tot isto ta continar con o procheuto más que rentable que t´a burguesía supone a existenzia de España, y con a complizidat d´a clase politica caziquil aragonesa.

Contra ixo nomás nos cal l´auto-organizazión popular ta creyar una alternatiba anticapitalista enradigada en a nuestra reyalidat nazional que responda a las agresions españolas y le dé a parola a o pueblo. O pueblo aragonés tien dreito a dezidir sobre o suyo futuro y a organizar-se d´a traza que creiga más conbenién seguntes os suyos intereses, que no son os d´España y a burguesía.

O 20 d´Abiento ha de estar un diya de luita per a nuestra emanzipación nazional y de clase, y ixa luita ha de continar de traza firme y cutiana dica conseguir os nuestros ochetibos: l´autodeterminazión, a independenzia y o sozialismo.

Entalto Aragón libre y sozialista!
Visca el Poble!
Entalto a Reboluzión!

En Aragón, Abiento de 2007
Bloque Independentista de Cuchas (B.I.C.)

http://aenrestida.blogia.com/