Bi eraso matxista atera dira argitara Gasteizen

Ostegunean bi gizonezko atxilotu zituzten Gasteizen(Araba), emakumeen aurkako indarkeriarekin lotutako gertakarien ondorioz. Lehenengo atxiloketa eguerdi inguruan izan zen. 21 urteko gazte bat atxiki zuten udaltzainek, aurretik ezarrita zituen urruntze aginduak behin eta berriz urratzeagatik. Iturri polizialen arabera, gizona arriskutsutzat jotzen zuten, suzko armaren bat gainean eraman zezakeelakoan. Zabalgana auzoan topatu zuten eta bertan eraman zuten atxilo.

Beste esku-hartzea gauerdia pasata gertatu zen, Alde Zaharrean. Emakume batek larrialdi zerbitzuei jakinarazi zien bikotekideak eraso egin ziola. Poliziak iritsi zirenean, jakin zuten 35 urteko gizonezkoak eta emakumeak eztabaida izan zutela eta bi aldeek zauriak zituztela. Gizona atxilotu egin zuten indarkeria matxistaren delitupean.