Causa Galiza reune mais de duas mil pessoas na manifestaçom unitária da esquerda soberanista

Compostela, 25 de Julho de 2007

Mais de duas mil pessoas secundárom esta manhá a manifestaçom unitária da esquerda soberanista convocada pola plataforma Causa Galiza. Sob a legenda “Autodeterminaçom”, a marcha partiu da Alameda pouco depois da umha da tarde e, trás percorrer várias ruas compostelanas, rematou na praça do Toral. Neste lugar, onde Braulio Amaro e Charo Lopes, dous dos porta-vozes da entidade, lêrom o manifesto da Causa Galiza. Depois do acto foi realizado um jantar de irmandade no Centro Social O Pichel.

No acto também se denunciou o estado policial que viveu a cidade de Compostela por volta do 25 de Julho, com especial referência às cargas policiais da noite do 24, com o resultado de oito pessoas hospitalizadas e várias feridas, destruçom de material e mesmo desapariçom da caixa dalguns colectivos, assim como a detençom dum militante por realizar labores informativos. Os propios membros da Causa Galiza sofrêrom esta situaçom com a retençom de vários deles por volta de umha hora quando estavam a distribuirem cartazes e faixas da plataforma.

As pessoas, coletivos e organizaçons políticas aderidas à Causa Galiza coincidem em assinalar a insuficiência do sistema autonómico para dar soluçom aos problemas do país. A previsível reforma estatutária manterá Galiza amarrada e sem direitos, sem capacidade para decidir sobre o seu modelo socioeconómico, sobre o quadro jurídico-político que melhor responda aos interesses da maioria ou sobre as medidas necessárias para garantir a plena normalizaçom social do idioma. O país também seguirá sem direito a gerir os recursos naturais atendendo as suas próprias necessidades e nom às do exterior. Neste sentido, o reconhecimento do direito de autodeterminaçom é umha garantia fundamental de um futuro de liberdade e justiça social, porque sem autodeterminaçom nom pode haver democracia.

Causa Galiza é umha entidade social ampla e de esquerda na que confluem pessoas, colectivos, organizaçons e forças políticas galegas comprometidas com a defesa do direito de autodeterminaçom do nosso país. Todos estes sectores autodeterministas decidimos nos últimos meses iniciar unha nova caminhada conjunta que sirva para dar coerência e unidade às reivindicaçons existentes no seio do nosso povo, e que nom estám representadas nos consensos da oficialidade, nem na só aparente diversidade de ofertas políticas da precária democracia em que vivemos. Causa Galiza foi apresentada publicamente o passado 14 de Julho na Igreja de Sam Martinho Pinário de Compostela.

Causa Galiza
www.causagz.org