Maderas de Llodioko kaleratzeen epaiketa izan zen atzo

EAEko Auzitegi Nagusira heldu da Maderas de Llodio enpresako kaleratze kolektiboen eta ekoizpen murrizketaren kasua. Epaileak erabaki beharko du enplegua erregulatzeko espedientea bidezkoa, bidegabea edo nulua den. Soilik nulua bilakatuz gero egongo lirateke aldaketak egungo egoeran, baina epaiaren berri hurrengo asteetan emango dute.

Atzo grebalari ugari bertaratu ziren Bilbora(Bizkaia) epaitegietan protesta egiteko. Hasieran euren ordezkari legalak babestu dituzte eraikinaren sarreran eta gero epaiketaren areto parera mugitu dira.

Maderas de Llodioko langileek 144 egun bete dituzte greba mugagabean, enpresak ezarritako Enplegua Erregulatzeko Espedientearen aurka. 39 langile kaleratzea planteatu zuen Garnica taldeak hasieran, eta 35 beharginera jaitsi zuen kopurua gero, kontsulta epearen ostean. Baja boluntarioetarako epe labur bat ireki zuen jarraian, eta horren ostean iritsi dira kaleratzeak.