ePub
pdf
Asturies: Despiste
Los qu’usaben el nome d’Andecha Astur (o los sos restos) mazcarítense y preséntense como daqué nuevo pero siguen coles mesmes zunes de siempre; ensin falar de lo de Xixón (CUPX), onde agora van de la mano de los qu’hasta hai poco yeren "enemigos de la patria asturiana" Anda’l piteru asturianista tou revueltu pa les próximes elecciones, y dame la sensación de qu’hai munchos gallos pa tan pocu corral. Dígolo porque nestos más de trenta años d’actividá organizada del asturianismu políticu nun fomos quién a enanchar esi espaciu onde poder coincidir aquellos que tenemos una visión nacional d’Asturies con una parte representativa de la so sociedá.
Les elecciones tán dexando claro, como nunca, qu’una parte d’esi asturianismu nunca tuvo estratexa nin planificación. El PAS (o los sos restos) sigue falando de renovación y rexeneración na vida pública del país y presenta al so eternu candidatu, qu’ufierta un discursu victimista sofitáu nel agraviu comparativu: «Los asturianos nun somos menos españoles que los otros». Los qu’usaben el nome d’Andecha Astur (o los sos restos) mazcarítense y preséntense como daqué nuevo pero, pamidea, siguen coles mesmes zunes de siempre; ensin falar de lo de Xixón, onde agora van de la mano de los qu’hasta hai poco yeren enemigos de la patria asturiana (asonsañando la so propia terminoloxía). Tenemos tamién la presencia del asturianista comodín, qu’igual val pa tar nuna organización d’esquierda revolucionaria que nun partíu de centru lliberal-demócrata o siguir a un caudiellu redentor como Cascos. P’acabar, ta la opción Bloque-UNA, que vio cómo destacaos impulsores del proyectu nun xubíen al carru o abandonábenlu a la primera.
Sicasí, nun voi ser yo quien eche per tierra les ilusiones d’estos últimos, que prometen un Compromisu por Asturies y foron quién a articular y materializar la so propuesta en venti conceyos, convirtiéndose na quinta fuerza política en cuantes a númberu de candidatures. Amás, pola voluntá demostrada y fecha realidá de llegar a un alcuerdu, paga la pena tenelos en cuenta. Quiciabes teamos énte’l principiu del fin del despiste del nacionalismu d’esquierda, que bona falta nos fai.
