La alernativa del nacionalismu d´izquierda asturianu

Claves pa salir del colonialismu que cadez Asturies per aciu de la única opción nacionalista d´izquierda n´Asturies.

Bloque por Asturies y UNA comparten la mesma visión d’ufiertar a la sociedá asturiana una propuesta política con voluntá de sumar les visiones del asturianismu, de la izquierda y del ecoloxismu políticu.

Les dos fuerces coinciden na necesidá de responder a la demanda ciudadana d’un sector de la población del país que pide una alternativa asturiana, dende la izquierda y l’ecoloxismu que saque Asturies d’una situación na que ta amenazada, especialmente nesta situación de crisis, la cohexón y la xusticia social, la protección del territoriu, y el caltenimientu de la nuestra llingua y cultura.

Dende Bloque por Asturies-UNA tenemos el determín d’entamar a construyir una alternativa que rexenere la vida política n’Asturies y qu’ufierte a la sociedá asturiana un programa con propuestes que valgan pa superar la situación de parálisis y de falta d’idees na que s’alcuentra Asturies a tolos niveles: ambiental, económicu, políticu, cultural y éticu. Una alternativa electoral na qu’aspiramos a que puedan sentise representaos tanto los sectores que piensen Asturies en clave de país y que defenden una propuesta política asturianista lo más amplia ya influyente posible, como la esquierda desilusionada con PSOE ya IU, que pide un nuevu referente políticu que busque nos oríxenes éticos de la izquierda el guañu de la necesaria rexeneración y adaptación al tiempu que vivimos. Una alternativa que seya atractiva pa tolos sectores sociales cansos col actual modelu políticu, y que busquen una opción política que-y vuelva’l dinamismu, l’arguyu y la ilusión a la sociedá asturiana. Un tercer espaciu que tien de ser plural y autónomu, que recueya lo meyor de la tradición de la izquierda asturiana, del asturianismu y el nacionalismu, del ecoloxismu social y políticu y que tea al serviciu de toles persones que quieren un cambiu políticu n’Asturies que rexenere y osixene la política del nuesu país.

¿Por qué fai falta una alternativa asturiana al statu quo?

Asturies lleva 30 años somorguiada nuna acción de gobiernu basada en polítiques de dependencia, clientelismu y subsidiaredá económica, política y cultural que fixeron que’l nuestru país se convirtiera nun territoriu dependiente y atrasáu.

Esti modelu social y políticu hexemónicu n’Asturies, lleva construyéndolu’l PSOE dende la transición a lo llargo d’unos años de gobiernu, atayaos por un periodu breve por un gobiernu en minoría del PP, nel que la rede clientelar que controla’l poder ye omnipresente y va texendo redes que trescalen tola sociedá a traviés de colectivos afines de toa mena; empreses, instituciones, sindicatos, círculos culturales, asociaciones… El PSOE convirtióse asina nel auténticu elementu vertebrador de la sociedá asturiana pente medies d’un réxime de tipu clientelar y de dependencia directa o indirecta con tentáculos que lleguen hasta los requexos más guardaos del texíu social asturianu, calteniendo una falsa imaxe d’esquierda que permite movilizar nel so porgüeyu a bona parte del nuestru pueblu que s’identifica con los valores y principios que la FSA diz representar pero que, contrastaos cola so acción política, rescamplen como meres declaraciones vacies y postures estétiques.

Esti modelu bipartidista de fechu ye, n’Asturies y nel conxuntu del estáu, l’antítesis del pluralismu, de la democracia y d’un modelu social, cultural y medioambiental alternativu que proponemos dende BA y UNA. Amás, nel contestu actual, el panorama políticu asturianu vien condicionáu pola crisis económica qu’afecta a tol planeta y que ye’l resultáu de la burbuya especulativa creyada nes dos últimes décades pol capital financieru. Pero n’Asturies esa crisis global vieno a sumase a la crisis estructural de la economía asturiana que vien arrastrándose dende’l colapsu del modelu estractivu-desarrollista a lo primero de los años 90.

La crisis asturiana ye una crisis estructural, del propiu modelu productivu que pilotó’l desendolque económicu asturianu per más d’un sieglu y qu’entró en crisis terminal col ingresu na CEE. Les crisis estatal y mundial nun vinieron entós a parar el desendolque del país, sinón más bien a poner de manifi estu les debilidaes evidentes de l’actividá económica asturiana que reproduz la situación del restu de la sociedá asturiana ye dicir, d’un modelu clientelar y sucursalista; per un llau los axentes con capacidá inversora dependen de lo público y son parte de la rede clientelar, y pel otru Asturies ye un espaciu de xuegu económicu al serviciu d’intereses ayenos a la sociedá asturiana. Los planes d’infraestructures, la política enerxética, asina como l’apueste o non por determinaes actividaes empresariales o les agresiones al mediu ambiente vienen condicionaos por intereses económicos y pola so conveniencia a otros territorios del Estáu español.

Y esto pasa cuando Asturies nun tien nengún pesu políticu nos ámbitos de decisión nos que se decide’l nuestru futuru. Tamos ausentes o ensin capacidá d’influencia en tolos foros nos que se decide qué modelu económicu, financieru y fiscal va condicionar a esti país porque la clase política asturiana con representación institucional ta presa d’intereses ayenos a Asturies y nun existe una opción política asturiana que defenda los intereses del país y de la so mayoría social.

Les inyecciones de perres públiques que se vienen inyectando n'Asturies dei venti años p'acá dende la UE nun sirvieron pa rexenerar l'actividá productiva esmantelada pol procesu de converxencia europea, sinón pa financiar obres faraóniques de duldosa viabilidá económica, caltener el monocultivu enerxéticu, subvencionar empreses pantasma que nun xeneren riqueza o trabayu más que'l tiempu que dure l'ayuda oficial, criar una rede clientelar cola que comprar conformismu social y caltener asina un votu cautivu col que perpetuar mayoríes electorales. Mentanto, yá más de la mitá de la población asturiana nun algama siquiera a ser mileurista.

Pesie a los discursos oficiales de voluntá d'avanzar na igualdá de xéneru, topámonos con que l'Asturies d'anguaño ye'l territoriu del Estáu onde mayor ye la desigualdá salarial ente homes y muyeres. Más p'allá de les bones intenciones, sigue pendiente una política de xéneru ambiciosa y valiente que faga una rialidá de lo que yá ta na llei.

La mocedá asturiano, el futuru del nuestru pueblu, vese abocao a la emigración o a la precariedá permanente, torgando la so emancipación vital y acabando presa de la desmovilización permanente y l'apatía política. La llingua asturiana sigue morriendo adulces ente la indiferencia de les alministraciones públiques que torguen cualquier posibilidá de poner en marcha un procesu d’oficialización y de normalización qu’asegure la so recuperación y que dacuando plantea una política abiertamente prohibicionista, una sirtuación na que tamién s’alcuentra l’eonaviego. La cultura asturiana conviértese, pa les autoridaes asturianes y los sos medios d'autopropaganda financiaos con perres públiques, non nel tesoru tresmitíu poles xeneraciones precedentes y que nós debemos conservar y arriquecer y convertir nuna exa central de la concepción d’Asturies, sinón como una torga, una estorbisa p'acceder a una supuesta modernidá y cosmopolitismu que nun ye otro qu'aculturización y asimilación a la llamada identidá española.

Les llibertaes civiles vense ca vuelta más amenazaes y violentaes tanto poles alministraciones asturianes como pola delegación del gobiernu español n'Asturies, que faen bandera de la represión sistemática de les protestes llaborales y ciudadanes escontra los atropellos oficiales.

Asistimos a una política d'agresión a los servicios públicos cola sida del recorte del gastu públicu, que repercute gravemente na baxada de la so calidá y capacidá de serviciu a la población que los financia colos sos impuestos.

¿Cuála ye la nuesa alternativa?

Dende'l Bloque por Asturies y Unidá Nacionalista Asturiana proponemos una alternativa política al bipartidismu oficial, monopartidismu real, que se ta imponiendo n’Asturies pa normalizar l’asturianismu políticu como una alternativa efectiva pa la nuestra sociedá. Proponemos una alternativa de tresformación económica, social, política, cultural y llingüística al serviciu del avance social que polo tanto aspira a representar non solo a les persones asturianistes, ecoloxistes o d’esquierdes. Aspiramos a ser la opción pa la parte de la sociedá asturiana que busca una alternativa al statu quo que n’Asturies impón el réxime bipartidista de PSOE-IU y PP.

Ye la nuesa ufierta pa esa parte de la ciudadanía asturiana que quier una alternativa política propia, que s’enserte como una pina ente los bloques de la mal llamada esquierda y la derecha d’obediencia estatal y que tenga como exes la defensa de los intereses de la mayoría social, la solidariedá, la normalización de la nuestra llingua y cultura y la defensa del nuestru mediu ambiente. Una ufierta programática qu’enmarcamos nestes exes:

a. Alternativa a la crisis del modelu compartíu pol PSOE-IU y el PP, que ta basáu nun espoxigue económicu insostenible basáu na depredación de los nuestros recursos naturales pa beneficiu d’intereses bastardos.
b. Autocentrada nes necesidaes d’Asturies y non nes indicaciones que se faigan dende Madrid pa decidir les polítiques que se faen nel país.
c. Moderna ya imaxinativa, que seya a meyorar la calidá de vida, la igualdá y l’autonomía de la mayoría social.
d. Rompedora col réxime de bipartidismu de fechu al introducir un tercer elementu que seya a triangular la política asturiana.
e. Positiva, que plantegue alternatives basaes non únicamente na negación o na oposición, sinón qu’ufierte un discursu en positivo que se perciba como una opción de progresu social.
f. Amplia, Bloque por Asturies-UNA conviden a sumase a otros colectivos y persones pa la so construcción en comuña.
g. Autónoma respective a los discursos del PSOE y PP, lo que nun quier dicir equidistante nin centrista, sinón independiente del sucursalismu.
h. Superadora de les actuales posibilidaes sociales y electorales del asturianismu políticu o de la esquierda alternativa, y que llegue a tolos asturianos y asturianes que quieren tener referentes políticos y votar en clave asturiana.