Xornaes de la Música Alternativa Asturiana

Col oxetivu de da-y puxu a la música asturiana dende l’Ensame Cultural Sonastur y FNAST.NET entamamos ente’l 25 y 29 d’agostu en Xixón estes primeres “Xornaes de la Música Alternativa Asturiana”.

Nelles afondaremos sobre dalgunes de les escenes musicales trabayaes n’Asturies. Repasando la so historia con dellos de los sos protagonistes, analizando los sos llogros y torgues y el futuru d’estos soníos, queremos abrir un espaciu d’alderique qu’avere y muestre a la sociedá asturiana que la música d’Asturies nun se llimita a lo que se sienti pela radio.

Esta primer edición ta dedicada a tres escenes musicales: Hiphop, Hardcore y Rock Astur. Nun son toles qu’hai; Asturies tien más mecigaya de soníos, pero pasín a pasín naguamos por qu’esti proyeutu pueda repetir en tiempu y forma xirando alrodiu d’otros estilos musicales.

Ensin más, queremos convidar a tola xente que lleáis estes llínies a participar nestes “Xornaes de la Música Alternativa Asturiana” en cualesquier de los estremaos actos; pero sobre too queremos llamar y demostrar que la nuesa música ta viva y que, pesie al silenciu mayoritariu, siempres existirán voces qu’amusen qu’esti país tien voz y son.

Martes 25: Hiphop n'Asturies

Nos años 80 l’exposigue mundial del hiphop aporta tímidamente a Asturies. Pasu ente pasu esta cultura al traviés del rap, el break dance y el graffiti va afitándose dientro de les nes nueses llendes.

Anguaño podría dicise que conviven delles corrientes y formes d’entender el hiphop n’Asturies: per un llau la reivindicativa, con lletres combatives y sociales; y pel otru otres corrientes más despolitizaes, de calter convencional y de barriu.

Nesta xornada axúntense tanto na mesa reonda como nel conciertu diferentes protagonistes de caúna de les corrientes del hiphop asturiano.

Miércoles 26: Hardcore n'Asturies

Los soníos hardcore llegaron con fuercia a Asturies nos años 80 y 90, naciendo con él delles bandes qu’algamaríen repercusión dientro y fuera de les nueses llendes.

Fanzines, festivales, conciertos autoxestionaos… formaben parte d’aquella cultura hardcore asturiana.Nos tiempos que cuerren siguen calteniéndose formaciones que, xunto a otres de nueva creación, mantienen viva la escena n’Asturies. Sicasí les formes d’enantes y les vieyes iniciatives camudaron, abriéndose un nuevu marcu pal “Asturies Hardcore”.

Xueves 27: SGAE, Piratería y Creative Commons

Nesta Asturies del sieglu XXI ye perdifícil falar de música ya industria musical ensin mentar a la SGAE, entidá que tien por xera xestionar y rexistrar los nomaos drechos d’autor nel Estáu Español.

Tampoco se pue escaecer un fenómenu como’l de la nomada “piratería”, fechu denunciao por artistes y pola SGAE y perseguíu poles autoridaes españoles, causando n’abondes ocasiones la persecución y represión del coleutivu inmigrante.

Énte los escesos de la SGAE a fines del pasáu sieglu crearónse los Creative Commons, un tipu de llicencies que da pie a la llibre circulación de la música y onde les restricciones d’autor les pon el propiu creador.

Nesta xornada cuntaremos con defensores de caún de los citaos fenómenos, aldericando sobre cómo apaez too esto dientro de la escena musical asturiana.

Vienres 28: Rock n'asturiano

La comunidá autónoma asturiana siempres sofrió una situación de marxinación llingüística, asina ye como nun ye estrañu que’l númberu de grupos qu’escoyieron l’asturianu como llingua vehicular seya menor que nes comunidaes plurillingües vecines.

Aún asina yá nos años 70 entamaron a surdir grupos de rock carauterizaos por cantar en llingua asturiana, formaciones que diben medrando col pasu les décades pesie a la inestabilidá de munches d’elles.

Anguaño n’Asturies esiste una escena de rock n’asturiano que, si bien nun ye mui bayurosa, cunta con dellos grupos afitaos y con reconocimientu del públicu d'Asturies. Nesta xornada participarán dalgunos de los vieyos y nuevos protagonistes d’esti rock fecho n’asturiano.

Sábadu 29: Folixa popular

Ufiertaremos esta información nos siguientes díes.

http://www.fnast.net/index.php?option=com_content&view=section&layout=blog&id=19&Itemid=140